رد المخرج بيتر ميمي على الجدل المثار حول مسلسل “الحشاشين”، وذلك من خلال حسابه الشخصي على موقع التواصل الأجتماعي “فيسبوك”.
بيتر ميمي يرد على تساؤلات الجمهور حول مسلسل الحشاشين
حيث رد بيتر ميمي من خلال منشور له عبر حسابه على “فيسبوك”، على كل تساؤلات وانتقادات الجمهور لمسلسل “الحشاشين” قائلًا : “طيب كل سنة وأنتم طيبين.. مع إني مكنتش حابب اتكلم علشان دول كلهم 4 حلقات!”
وأضاف : “مبدأيا المسلسل من وحي التاريخ وده مكتوب نصا في التترات يعني مش وثيقة تاريخية لكنه دراما تاريخية.. هو تارنتينو لما قتل هتلر في السينما كان حقيقة؟ أو نابليون في فيلم ريدلي سكوت الأخير هل ده نابليون اللي في كتب التاريخ؟ ديه دراما تاريخية.. حاولنا نعمل خيال تصويري لفترة من الفترات لكن في شكل درامي.. لكن رجعنا في الديكور والملابس لمراجع كتيرة ونادرة علشان نعمل عالم مشوفنهوش قبل كده وميكنش شبه أفلام او مسلسلات عالمية”.
وأكمل : “هل ده حسن الصباح؟ مفيش كتاب اتفق على حسن الصباح لأن المغول حرقوا القلعة وكتبه وأفكاره والمجهود اجتهاد… ماركو بولو أو فلادمير بارتول أو برنارد لويس أو فرهاد دفتري… وكتير جدا”.
“حسن الصباح كان بيعمل معجزات؟ لا طبعا!!! وده تباعاً مع الحلقات هيتفهم”.
واستطرد : “الحشاشين مسلسل تاريخي بالعامية المصرية.. الاحداث بيت اتراك و فرس .. لما عملوه الاتراك اتكلموا تركي و لما عملوه الامريكان بيتكلموا انجليزى .. احنا عاملينه فى مصر و الترجمة موجودة فى كل بلد.. المسلسل بيتعرض فى روسيا و امريكا و اكتر من بلد كل بلد بلغتها..هم الڤيكنجز كانوا بيتكلموا انجليزى؟ ولا ويليام والاس كان بيتكلم اللكنة الامريكية”.
“ليه حسن الصباح؟ حسن الصباح شخصية فذة وغريبة ومستفزة أنك تعرف عنها.. مش لازم يكون رمز للخير علشان يتعمله مسلسل.. هتلر وراسبوتين كانوا في منتهى الشر لكنهم شخصيات فذة غيرت العالم.. أو على مستوانا المصري خط الصعيد أو سفاح إسكندرية”.
وتابع حاجات صغيرة،
– أم الخليفة رصد كانت نوبية الأصل
– إسكندرية مدينة في مصر.. لأن فى مدن كتير باسم إسكندرية حوالين العالم.. لزم التوضيح للترجمة لأن فيه غير مصريين بيتفرجوا على المسلسل
– مجاعة القاهرة الفاطمية مثبوتة تاريخيا لكن تعددت أشكالها حسب المصادر وهي على فكرة كانت قبل وصول حسن بفترة مش بعيدة بس ديه دراما (من وحي التاريخ)
– ماتسمى بمعجزات حسن الصباح مقصود تتصور بالشكل ده و ده هيبان تباعا وخصوصا مشهد الراوي حلقة 8
– عم ملك شاه اتقتل بوتر القوس لأن ده كان عرف و تقليد
مين الست اللى بتظهر لحسن الصباح؟ ده في حلقة 30 بقى لو ربنا أدانا عمر..
وأنهى كلامه : “كل سنة وأنتم طيبين وسعيد أن المسلسل خلاكم تقروا وتسألوا.. وشوية شوية هتفهموا المسلسل.. صحصحوا معانا كده يا شباب خلونا نعمل شكل جديد.. وتبقى بداية ومع الوقت يتعمل أفضل وأكبر وأحسن من اللي إحنا عاملينه.. ومع الوقت ننافس”.
مسلسل الحشاشين
المسلسل بطولة كريم عبدالعزيز وفتحى عبدالوهاب ونيقولا معوض وميرنا نور الدين وأحمد عيد، تأليف عبدالرحيم كمال، وإخراج بيتر ميمي.
إذا أعجبكِ هذا الموضوع اطلعي على بعد تصدره الترند. مواعيد عرض «الحشاشين» والقنوات الناقلة