اتهم المخرج أحمد البنداري، الفنان محمد سعد، بسرقة أحد أعماله السينمائية التي يقوم الأخير بتصويرها حاليًا، عبر حسابه الشخصي على موقع التواصل الاجتماعي “فيسبوك”.
وكتب أحمد البنداري، قائلًا :”فيلم الدشاش ده أصلًا اسمه كعب داير، وكان مترشحله نجوم تانية يا ريتني كنت روحت لأي حد فيهم”.
وتابع أحمد البنداري، قائلًا : “المهم عن طريق صديق مشترك وديته لمحمد سعد تحت اسم “الحاوي” وكان سعد ترشيحي أنا رغم تحذير ناس كتير من التعامل مع سعد كنت مصمم عليه وشايفه نقلة ليا وليه”.
وأضاف أحمد البنداري، قائلًا : “المهم بعد 3 شهور شغل عليه من اللف على المنتجين بالتوازي شغل على التصور البصري كله directors treatment وvisual file وشكل الشخصيات واللبس والديكور وطريقة الإخراج والمونتاج والـ color pallet و ستوري بورد كاملة علشان أروح للنجم بتصور كامل للفيلم مش رايحين نهزر يعني”.
واستكمل أحمد البنداري، قائلًا : “المهم بعد مكالمات و مواعيد كتير روحتلة البيت أنا والمؤلف (اللي مش بالوم عليه لأنه بقاله كتير مستني فرصة من نجم المفروض أنه كبير) المهم، المفروض السيناريو كان عاجب سعد جداً ومتحمسله جداً خصوصاً إنه كوميدي دراما مش فارس كوميدي زي كل أفلامه”.
وأردف أحمد البنداري، قائلًا : “كان في شركة كبيرة ومنتج كبير موافق على الفيلم بحذر طبعاً لسمعة محمد سعد مع المخرجين إنه لكني طمنتة وقولتله ماتقلقش سعد عاجبه الفيلم و متفقين على الخطوط العريضة كلها و كان شرط سعد الوحيد إن المنتج مايعترضش على أجره الكبير، ده كان كلامه بالحرف”.
وواصل أحمد البنداري، قائلًا : “المهم المنتج ده كلم سعد واداله أكتر من ميعاد وسعد لغى كل المواعيد لأسباب مختلفة، لحد ما في يوم كلم هو المنتج و قاله إن الفيلم مش عاجبه وإن السيناريو ضعيف وإنه عايز يبقى يحدد معاه ميعاد على فيلم تاني (لما نجم المفروض كبير يقول لمنتج إن الفيلم اللي بقالي شهور مجننه معايا فيه إنه فيلم ضعيف ووحش هو قتلي فرصي مع المنتج ده وقتها)”.
وتابع أحمد البنداري : “المهم لما المنتج كلمني وقالي استغربت جدا لأن ده عكس كلامه ١٠٠٪، المهم بعدها كلمته قالي نفس الكلام إنه الفيلم مش عاجبه ماحبتش أطول في المكالمة خصوصاً إن ده حقه إنه يعجبه فيلم أو مايعجبوش مع إنه مقالش كده من الأول بالعكس والحمد لله على نعمة التكنولوجيا الواتساب كله موجود”.
وأشار أحمد البنداري، قائلًا :”بس الغريب إني اكتشف بعد كده إن الدشاش هو الحاوي مع مخرج تاني ومنتج تاني ليهم كل الاحترام والتقدير والتمنيات بالتوفيق، مع الفارق في نجم كبير جدًا مش هقول اسمه روحتله بفيلم شوفت منه صراحة ووضوح في اللي عاجبه واللي مش عاجبه وقاري الفيلم كويس مش حد قاري وحاكيله الفيلم، ده غير التزام رهيب في المواعيد مع إنه حقيقي مش فاضي لحد آخر ٢٠٢٥ يعني ممكن مانشتغلش الفيلم ده أصلاً مع بعض”.
واختتم أحمد البنداري : “لكن عرفني ليه الراجل ده محافظ على نجوميته بقاله ٢٠ سنة تقريباً لأنه بيسمع للآخر وبيقرا كويس وملتزم لأقصى الحدود، ربنا يوفق الجميع وده كان تحذير لأي صانع أفلام من التعامل مع محمد سعد، من غير ما يكون مأمن نفسه ومجهوده ١٠٠٪ لأن مجهودك والتزامك وصدقك دول شرفك في الشغلانة دي، وهما اللي هيخلوك تعرف تحط صوابعك في عين التخين وتقوله كده غلط وعيب ومايصحش كده انت المفروض كبير والكبير مابيلفش ويدور، عمومًا أنا بعد الموقف ده وموقف شبيه حصلي السنة اللي فاتت بدعي وبقول يا رب 5 مليون دولار ونبطل شغل”.
